Ginalauman nga mapasaka ang mapag-on nga kaso batok sa suspek ukon mga suspek nga nagtiro-patay sa punong barangay sang Ginot-an, San Joaquin, Iloilo.
Kahapon sang kaagahon, Pebrero 26, sang nasapwan nga wala na sang kabuhi kag may igu sang bala sa dughan si Punong Barangay Richard Sapalo, 53.
Kasunod sang amo nga hitabo, nagmandu si Iloilo Police Provincial Office (IPPO) Director Police Colonel Bayani Razalan sa pagtukod sang Provincial Special Investigation Team ukon PSIT Sapalo agud nga matutukan ang kaso.
Sa interview sang Bombo Radyo kay Police Lt. Colonel Rolando Araño, spokesperson sang IPPO, iya ginpahayag nga tuyo sang team nga mapadasig kag mapadalman ang imbestigasyon agud matukiban ang suspek kag mapasakaan sang kaso.
Si Razalan ang nagapungko nga supervisor samtang commander naman ang Deputy Provincial Director for Operations.
Gina-updan ini sang pwersa sang Criminal Investigation and Detection Group (CIDG), Scene of the Crime Operation (SOCO), kag San Joaquin Municipal Police Station.
Gina-usisa sang kapulisan ang madamo nga anggulo lakip na ang posibilidad nga naangot sa trabaho ang krimen, ukon ang posibilidad nga may daan nga hiligut-anon sa tunga sang suspek kag biktima.
Una na nga ginpahayag nga nakabaton na ang biktima sang pagpamahog sadtong bisperas sang Bag-ong Tuig.
May nabatian sa frequency sang handset radio sang barangay nga may nagsiling nga “Happy Condolence kay Kap Sapalo” apang wala sang may nakahibalo kun sin-o ang nagpadala sang amo nga mensahe.
Nahibaluan nga natabo ang pagpatay sa biktima sa adlaw mismo sang iya ika-53 nga kaadlawan.#
