ILOILO CITY – Indi pa makabyahe ang pila ka mga unit sang mga pampubliko nga jeep sa syudad sang Iloilo subong nga adlaw.
Sa interview sang Bombo Radyo kay Raymundo ‘Boyet’ Parcon, Presidente sang Iloilo City Loop Alliance of Jeepney Operators and Driver’s Association, iya ginpahayag nga gamay lang ang magabyahe nga Public Utility Jeepneys bangud nga atrasado ang paghatag sang requirements nga ginpasa sa Land Transportation Franchising and Regulatory Board.
Suno kay Parcon, wala nasapar sang Land Transportation Franchising and Regulatory Board nga aprubahan ang ila mga special permits bangud sa kadamuon sang mga nag-apply.
May kaangtanan naman sa pagdugang sang pamasahe, ginpahayag sang natungdan nga gin-aprubahan na sang Land Transportation Franchising and Regulatory Board kag Department of Transportation ang P1.50 nga dugang kun sa diin mangin P9 na ang regular fare.
Samtang nagpasalig naman ang Public Safety and Transportation Management nga wala sang nagakadapat nga ikabalaka ang mga pumuluyo bangud may yara man sang 28 ka mga modernize jeepney nga magabyahe sa syudad lakip man ang mga Ceres Bus.
Sa interview sang Bombo Radyo kay Jeck Conlu, pinuno sang Public Safety and Transportation Management iya ginpahayag nga magasapol pa sila subong nga adlaw kaupod ang Land Transportation Franchising and Regulatory Board kag asosasyon sang mga jeepney operators sa syudad agud istoryahan ang pagsugod sang byahe sang mga pampubliko nga salakyan.
Suno kay Conlu, naka standby naman subong ang ila talatapan agud mag tsekyar kun ginasunod sang mga tawo ang mga pagsulundan kaangay sang pag obserbar sang social distancing.
