ILOILO CITY – Gintalana sa Hulyo 26, Biyernes, ang special session sang Iloilo City Council agud istoryahan ang pagdeklarar sang State of Calamity sa syudad sang Iloilo bangud sa pagdamu sang numero sang Dengue Hemorrhagic Fever.
Ini ang ginkasugtan sa pagsinapol nga ginpatawag ni Iloilo City Mayor Jerry Treñas kag gintambungan sang mga department head sa Iloilo City Hall, Disaster Resilience Groups kag City Health Office.
Sa interview sang Bombo Radyo kay Treñas, iya ginpahayag nga kinahanglan na nga ipaidalom sa State of Calamity ang syudad sang Iloilo agud nga magamit na ang calamity fund para sa pagbakal sang mga sprayer, misting machine kag chemicals agud nga mapatay ang lamok.
Suno kay Treñas, lakip sa mga pagahatagan sang sprayer amo ang tagsa ka barangay, mga eskwelahan kag mga civic organization agud nga mas malapad ang sakop sang spraying kag misting.
Magluwas sa pagbakal sang sprayer, misting machine kag chemical, ginpahayag man sang alkalde nga maga-hire sang dugang nga doktor, nurses kag medical technologist ang Iloilo City Government agud nga magbulong sa nagadugang nga pasyente sa mga hospital.
Samtang, suno naman kay Dr. Mae Delmo sang City Health Office kag natuon sa Dengue Information on Dengue concerns, iya ginpahayag nga naglab-ot na sa 868 ang kaso sang Dengue sa syudad sa diin walo na ang patay apang ginahulat pa ang death certificate sang duha ka mga biktima bag-o malakip sa listahan sang mga Dengue casualty.
Naglab-ot na sa 37 ka barangay ang nalakip sa listahan sang mga lugar nga may yara sang clustering cases sang Dengue.
Sa subong suno sa natungdan, padayon pa ang validation sa mga impormasyon tuhoy sa mga Dengue patients sa syudad sang Iloilo.
