Padayon ang spraying kag misting sang mga barangay sa Iloilo City nga na-identify sang City Health Office (CHO) nga may mataas nga kaso sang dengue.
Sa interview sang Bombo Radyo kay Joselito Daylisan, Team Leader, iya ginpahayag nga gin-una nila misting ang Calaparan Elementary School kag Calaparan National High School kag nagpadulong sa Sto. Niño Sur, Arevalo, Iloilo City.
Suno kay Daylisan, lakip man sa ila ginpang-spray nga area amo ang mga daycare center sang nasambit nga Distrito.
Ginpahayag man sini nga apat ka mga barangay sa amo nga Distrito ang ila ginpadulungan agud nga magpatuman sang misting kag spraying.
Prayoridad naman sang ila team ang mga eskwelahan agud nga maprotektahan ang mga kabataan nga naga-eskwela.
Nahibaluan nga nagapanguna ang Brgy. Sooc, Arevalo, ginasundan sang Brgy. Calumpang, Molo, kag sang Brgy Calaparan, Arevalo ang may pinakamadamo nga kaso sang dengue sa Iloilo City.
