Napilitan ang gobyerno sang Sri Lanka nga mag-anunsyo sang weekly quota sa gatong nga ginabakal sang mga motorista.

Tuga ini sang nagalala nga kakulangan sang suplay kag nagalawig pa nga mga pila sa nabilin nga mga gasoline stations.

Suno kay Energy minister Kanchana Wijesekera, ang Ceylon Petroleum Corporation (nga ginapadalagan sang gobyerno), ang nabudlayan subong nga mag-finance sang oil imports, samtang nga nagasaka naman ang consumption bangud sang naganubo nga suplay sang electricity kag liquefied petroleum gas.

Ang pag-register sa mga consumers sa filling stations kag paghatag sang guaranteed weekly quota amo ang nabilin nga solusyon suno sa opisyal sa amo nga problema-pinansyal.

Iga-implementar ini sa una nga semana sang Hulyo, apang wala pa subong ginpahayag kun tubtub pila ang pahanugutan nga baklon sang kada motorista sa idalom sang bag-o nga sistema.

Nahibaluan nga ini ang ginakabig nga pinakamalala nga economic crisis nga ginsuprer sang Sri Lanka sa sulod na sang pila ka dekada.

Indi na makasarang ang pungsod sa pag-import bisan sang basic necessities kaangay sang pagkaon, fuel, kag medication bangud sang kakulangan sang foreign exchange reserves.

Sang tunga-tunga nga bahin sang Abril, matandaan nga nagmandu ang gobyerno sa mga gasolinahan nga indi pagpasobrahan sa apat ka litro ang tughong nga gatong sa mga motor; indi magsobra sa lima ka litro sa three-wheeler; kag indi magsobra sa 19.5 liters sang gasolina ukon krudo sa cars and SUVs.

Sang ginpatuman ang amo nga sistema, nagbinalik-balik man gihapon ang mga motorista, naglawig ang pila, kag may mga tion pa nga inadlaw pa ang pagpila sa filling stations antes makapatughong ang mga salakyan.