ILOILO CITY – Gin-ako sang Sri Lanka nga na-bankrupt na sila kag yara sa delikado ang sitwasyon bangud sang wala ginalauman nga economic crisis nga magalawig tubtob sa katapusan sang masunod nga tuig.
Ini ang ginpahayag ni Prime Minister Ranil Wickremesinghe sa parliament.
Ang pungsod nga ginabug-usan sang 22 ka milyon ka tawo ang nagsuprer sang binulan nga nagtimbuok nga inflation kag malawig nga pag-untat sang suplay sang kuryente bangud sang pag-utod sang foreign currency kag pag-import sang vital goods.
Suno sa prime minister, ang pungsod ang maka-eksperyensya sang recession subong nga tuig kag magapadayon ang tuman nga kakulangan sang pagkaon, produktong petrolyo kag bulong.
Sa subong, padayon ang negosasyon sang Sri Lanka sa International Monetary Fund (IMF) bilang isa ka bankrupt country.
Magapasa sang debt sustainability ang Sri Lanka sa IMF.
Suno sa IMF sang nagligad nga semana, kinahanglan ang mas madamo nga trabaho agud nga ma-set ang finances right kag ma-repair ang runaway fiscal deficit antes makasirado sang deal para sa funding arrangement agud nga masolbar ang balanse sa payment crisis.
Ang Sri Lanka ang sa karon wala na sang supply sang petrolyo kag gin-untat na sang gobyerno ang non-essential public services agud nga makakinot sang gatung.
Suno naman sa United Nations, ginabanta 80 percent sang publiko ang wala nagakaon sang maayo agud nga makakinot bangud sang food shortage.
