ILOILO CITY- Ginkumpirmar sang Department of Trade and Industry (DTI) ang increase sa suggested retail price (SRP) sang pila ka basic necessities kag prime commodities.
Sa interview ni Ms. Judith Degala, director sang DTI Iloilo, iya ginpahayag nga rasonable man ang pagpataas sang presyo nga gin-aprubahan sang DTI kag isa sa mga rason ang pagsaka sang presyo sang gatong.
Suno kay Degala, nag-agi sa husto nga proseso ang pag-approve sang pagpataas sang presyo, kag ini ginalakipan sang request gikan sa manufacturers nga magpasaka sang SRP kag ang ila rason.
Pahayag niya, ini ang ginapaidalom man sa maid-id nga review sang National Price Coordinating Council nga masami nagalawig sang 30 ka adlaw.
Ginpaathag naman ni Degala ang kinalain sang basic necessities sa prime commodities.
Suno sa iya, ang basic necessities amo ang mga produkto nga tuman ka importante sa mga pumuluyo ilabi na sa tion sang kalamidad kaangay sang mga ready to eat kag halimbawa diri amo ang sardinas,tinapay, instant noodles,kag bottled water nga mainom; habon kag kandila.
Ang prime commodities naman amo ang mga produkto nga kinahanglanon apang mabuhi gihapon ang tawo kun wala ang mga ini kaangay sang delata, corned beef, meat loaf, beef loaf, kag mga panakot sa lulutuon.
Dugang sang natungdan, sa 218 ka basic necessities, 82 ang may bag-o nga SRP epektibo Mayo 11, 2022 kag ang iban ang wala sang paghulag sa presyo.
Ang kalabanan naman sa mga produkto ang may increase lang sang 1% tubtob 5%.
