Nagdepensa sang Social Security System (SSS) sa pagsaka sang contribution rate nga epektibo na umpisa sang Enero 1, 2025.
Halin sa 14% sang nagligad nga tuig, nagtaas ini sa 15% subong nga 2025 base sa bag-o nga set sang guidelines nga gin-release sang SSS sang nagligad pa nga Disyembre 19.
Suno kay Carlo Villacorta, SSS Head for Public Affairs and Special Events Division, ang mas mataas nga contribution rate ang kabahin sang Republic Act 11199 ukon ang Social Security Act of 2018.
Ini ang nagamandu sa SSS nga taasan ang contribution rate sa kada duha ka tuig kag ang final increase amo ang ipatuman subong nga 2025.
Sang 2019, yara ang contribution rate sa 12 percent; nagsaka sa 13 percent sang 2021; kag 14 percent sang 2023.
Ini nga rate ang tungaon sa employer kag sa empleyado. Para sa 15 percent contribution rate subong nga tuig, 10 percent ang sabton sang employer samtang ang empleyado naman ang magasabat sa nabilin nga 5 percent.
Suno kay Villacorta, ginasunod lang nila kun ano man ang nakabutang sa layi.
Halimbawa, kun P10,000 ang bulanan nga income sang tawo, may P1,500 SSS contribution (shared sa employer) nga mas mataas sa P1,400 nga ginbayaran sang 2024. Kun mas mataas ang sweldo, mas mataas man ang contribution rate.
Madamo ang nagapamatok diri kag nagapanawagan sang suspension apang suno sa SSS, importante nga mapatuman ini bangud kun wala ini, maubos na ang pondo sang SSS kag tubtub na gid lamang sa 2032.
“Without this, the fund of SSS will only last up to 2032 with the additional pension benefit of P1,000 given to all pensioners starting 2017. The schedule of contribution rate increases or MSC monthly salary credit, now the fund life has been extended to 2053,” pahayag ni Villacorta.
