Nagpaguwa ang Social Security System (SSS) sang 13th month kag December pensions nga nagabalor sang PHP32.19 billion sa masobra 3.6 million ka mga pensyonado.
Suno kay SSS officer in charge Voltaire Agas, ang una nga batch ginpanagtag sa 2.09 million ka mga pensionado sang Nobyembre 29, nga nagabalor sang PHP17.9 billion, nga nagasakop sa mga pensyonado nga may mga dates of contingency sa sulod sang una tubtob ika-15 nga adlaw sang bulan.
Ang ikaduha nga batch, nga nagalab-ot sa PHP14.3 billion, ginpaguwa sang Disyembre 4, nga nakabenepisyo sa 1.52 million ka mga pensyonado.
Nahibaluan nga ang SSS nagpaguwa man sang mga PHP41.6 million nga balor sang 13th month kag December pensions sa masobra 6,000 ka mga pensyonado paagi sa mga bangko kag tseke nga wala nagapasakop sa PESONet.
