ILOILO CITY- Ginpadayon na sang Social Security System (SSS) ang programa sini nga nagalagas sa mga employers nga wala naga- remit sang kontribusyon sang ila mga empleyado.
Suno sa SSS, gin-resume sang ila president kag chief executive nga si Michael Regino ang Run After Contribution Evaders (Race) operations nga temporaryo sadto nga ginpauntat sa tunga sang COVID-19 pandemic.
Sa operasyon sa Metro Manila, nadiskubrehan sang SSS ang 10 ka employers nga ang contribution delinquencies nagdangat sa P26.3 million.
Napaslawan ang mga ini nga mag-remit sang P9.1-million nga balor sang contributions gikan sa 95 ka SSS members, kag dugang nga P17.1 million nga multa.
Suno kay Regino,bilang general rule, ginhatagan ang mga ini sang 15 calendar days umpisa sa adlaw nga nagpadulong sa ila ang SSS agud mag-settle sang obligasyon.
Nagpaandam si Regino nga sa idalom sang Republic Act (RA) No. 11199 ukon Social Security Act of 2018, ang employer nga mapaslawan ukon mamalibad nga magrehistro sang ila empleyado, nagbuhin sang contributions halin sa ila apang napaslawan nga i- remit lakip na ang employer’s share sa SSS, ang multahan sang P5,000 tubtob P20,000, kag mapreso sa sulod sang anom ka tuig tubtob 12 ka tuig.
