Nagdepensa ang Social Security System matapos ginhingadlan ni Presidente Rodrigo Duterte bilang isa sa mga ahensya sang gobyerno nga masami nga ginareklamo bangud sa lawlaw nga serbisyo kag madugay nga transaksyon.
Sa interview sang Bombo Radyo kay Mr. Amiel Genova, Acting Senior Communications Officer sang Social Security System- Iloilo Central Branch, iya ginpahayag nga madugay na sila nakapatigayon sang pagpa-improve sang ila serbisyo.
Suno kay Genova, may yara sang digitalization sa ahensya sa diin mahimo na nga makarehistro, makaproseso kag makapatigayon sang transaksyon sang online.
Suno pa sa iya, may yara man sang mobile application nga mahimo libre nga i-download sa cellphone agud mas mangin mahapos ang pagpatigayon sang transaksyon.
Samtang, kun personal ang transaksyon sa ahensya, ginpahayag sang natungdan nga may yara sila sang public assistance desk kag mga counters nga magaakomodar depende sa transaksyon sang miembro.
