Naghiwat sang candle lighting ang St. Clements Church kadungan sa pagkomemorar sang ika-39 nga anibersaryo sang EDSA People Power Revolution.
Sa interview sang Bombo Radyo kay Father Frank Tobin, redemptorist priest sang St. Clements Church, iya ginpahayag nga ginakalipay nila ang nangin madinalag-on nga response sang kadam-an sa panawagan sang padumdom sa makasaysayan nga hitabo sa pungsod.
Suno kay Tobin, kinahanglan nga dumdomon ang sakripisyo sang mga Filipino nga nagtanyag sang ila kabuhi agud maangkon ang demokrasya.
Para sa iya, kon indi makomemorar ang kahiwatan, daw kaangay nga gintalikdan ang mga leksyon nga natun-an sa 1986 EDSA People Power.
Nagalaum man ini nga wala sang makalipat nga maghatag sang kadungganan sa mga baganihan nga nagsakrapisyo sang ila kabuhi.
Nahibaluan nga antes ginpatigayon ang candle lighting sa amo nga simbahan, ginatos ka mga bumulutho, rehilyoso kag progresibo nga grupo, ang nagmartsa gikan sa West Visayas State University padulong sa Iloilo Provincial Capitol agud ikomemorar ang EDSA People Power Revolution.
