ILOILO CITY – Indi pa matumod sang tagdumalahan sang St. Paul’s Hospital Iloilo kun paano nalatnan sang virus ang walo ka mga doktor.
Sa interview sang Bombo Radyo kay Dr. Ella Mae Divinagracia, pinuno sang Infectious Disease Clinic sang St. Paul’s Hospital Iloilo, iya ginpahayag nga may isa ka pasyente halin sa Capiz ang ipaidalom kun tani sa medical operation sang Hunyo 26 apang bilang protocol, kinahanglan anay nga ipaidalom sa Rapid test ang tanan nga pasyente antes operahan.
Bangud nagpositibo sa Rapid test, ginpahayag ni Divinagracia nga wala nadayon ang medical operation kag sa baylo, ginpaidalom sa RT-PCR test ang pasyente apang negatibo ang resulta.
Bangud nga may routine test sa mga medical staff sang nasambit nga hospital, natukiban nga positibo sa COVID-19 ang walo ka mga doktor.
Sa subong suno kay Divinagracia, padayon ang imbestigasyon tuhoy diri kag may kaangtanan naman sa security protocol nga ginapatuman, gindugangan na ang police personnel nga nagabantay sa entrance kag exit sang hospital.
May yara sang police assistance desk ilabi na para sa mga himata sang pasyente nga na-admit kun sa diin wala sang bisan sin-o ang mahimo makasulod kag ang mga yara sa sulod naman ang indi makaguwa sa hospital compound.
Kasunod sang pagpositibo sang walo ka doktor, wala naman sang may nagabaligya nga mga ambulant vendor sa saguwa sang nasambit nga hospital.
