ILOILO CITY – Balik na sa kinaandan nga operasyon sang St. Paul’s Hospital of Iloilo Inc. buwas nga adlaw, Hulyo 13.
Ini matapos nga gin-lockdown ang nasambit nga hospital bangud 11 ka medical kag non-medical staff ang nalatnan sang Coronavirus Disease 2019 (COVID-19).
Sa interview sang Bombo Radyo kay Dr. Ella Mae Divinagracia, pinuno sang Infectious Disease Clinic sang nasambit nga hospital, iya ginpahayag nga antes ang opening, nagpatigayon sang disinfection ang mga bombero agud masigurado nga hilway sa virus ang hospital vicinity.
Suno kay Divinagracia, may yara sang adjustments nga patigayunon agud nga malimitahan ang local transmission sang COVID-19.
Ginpahayag ni Divinagracia nga ang mga empleyado nga magabalik sa trabaho ang nakatapos sang 14-day mandatory quarantine.
Apisar sang nasambit nga pasalig, ginpahayag sang natungdan nga may mga reklamo tuhoy sa diskriminasyon sa mga medical kag non-medical staff sang St. Paul’s Hospital of Iloilo Inc.
Bangud sini, nagpangayo na sang bulig ang pamunu-an sang nasambit nga hospital sa Department of Health nga amo naman ang magapakig-angot sa tagsa ka Local Government Unit agud nga madula na ang diskriminasyon.
