Yara na sa warning status ang Sta. Barbara Dam nga nahamtang sa Brgy. Tungay, Sta. Barbara, Iloilo, suno sa datos halin sa Provincial Disaster Risk Reduction and Management Office ukon PDRRMO, base sa report sang National Irrigation Administration Region 6.
Suno sa impormasyon nga ginpagwa alas 5 sang hapon sang Hulyo 23, ang Sta. Barbara Dam may current water level nga 2.10 meters above river bed (marb), mas mataas sa iya normal operating level nga 1.8 marb.
Samtang, nagpabilin naman nga normal ang water level sang anum ka iban nga dam sa probinsya. Kalakip diri ang:
– Aganan Dam sa Brgy. Igtambo, San Miguel nga yara lang sa 1.35 marb, layo pa sa 2.6 marb nga normal;
– Jalaur Dam sa Brgy. Moroboro, Dingle nga yara sa 23.90 meters above sea level (masl), malapit sa 24 masl nga normal;
– Barotac Viejo Dam sa Brgy. Rizal, Barotac Viejo nga yara lang sa 0.50 marb kun sa diin 1.2 marb ang normal;
– Suage Ris Dam sa Brgy. Tolarucan, Mina nga may 1.50 marb, ubos sa 2.0 marb nga normal level;
– Sibalom Diversion Dam sa Brgy. Anonang, Leon nga may 1.80 marb, mas manubo sa 2.2 marb nga normal;
– kag ang Jalaur High Dam sa Brgy. Agcalaga kag Alibunan, Calinog nga may 164 masl, malayo pa sa 189 masl nga normal operating level.
Suno sa PDRRMO, wala pa sang dam sa Iloilo nga yara sa critical level subong nga tion.
Ginabantayan pa gihapon ang movement sang tubig bangud sang padayon nga ulan.
Reported by: Bombo Phauline Pillora
