Gin-ubo, ginsip-on kag nagpalanakit ang lawas sang alkalde sang Sta. Barbara, Iloilo bag-o nagpositibo sa COVID-19.
Sa exclusive interview sang Bombo Radyo kay Sta. Barbara, Iloilo Mayor Rema Somo, iya ginpahayag nga anom sila ka myembro sa pamilya ang nagpaidalom sa reverse transcription polymerase chain reaction (RT-PCR) test.
Suno kay Somo, nagpositibo siya sa COVID-19 kalakip na ang iya bana, kag iya lalaki nga anak sa diin asymptomatic ang kondisyon sang alkalde.
Pahayag ni Somo, madamo man ang iya nangin close contact sa diin kalabanan diri amo ang kaupdanan niya sa trabaho.
Apisar sini nagapasalamat ang alkalde nga wala pa sang may nagpositibo sa COVID-19 sa iya mga nakaclose-contact.
Sa subong suno sa iya, nakahome quarantine siya kalakip na ang iya bana kag anak sa diin mild na lamang ang ila kondisyon kag naga-amat-amat naman baskog ang iya pamatyag.
Dugang sang alklade, padayon pa ang contact tracing sa ila mga nakaupod.
Nagapangayo man sang paghangop ang alkalde kag nagapangabay sa tanan nga maghalong kag magsunod sa health protocols.
Nahibaluan nga kaupod ang iya bana, fully vaccinated na si Somo sa Sinovac COVID-19 vaccine.
