Nagapanindugan ang Sta. Barbara Municipal Police Station nga nagdepensa lang ang isa ka police personnel rason nga natiruhan-patay ang isa ka lalaki nga nagluthang man sa iya nga live-in partner sa Barangay Tuburan sa amo nga banwa.
Sa amo nga shooting incident, ang mga napatay amo sanday Jose Marco Ocampo, 48, kag Rachel Lopez, 40, lunsay mga residente sang Pavia, Iloilo.
Sa interview sang Bombo Radyo kay Pol. Lt. Aileen Lacrite, deputy chief of police sang Sta. Barbara Municipal Police Station, iya ginpahayag nga may personal nga problema ang mag-live in partner.
Sa banwa sang Pototan naghalin ang babayi, kag pag-abot sa Barangay Tuburan, nasugata sini ang salakyan sang lalaki sa radial road nga sakop sang amo nga barangay.
Ginapahayag nga ginbalagabagan sang lalaki ang salakyan ni Rachel, ginpapanaog siya, kag ginpalakat ang iban niya nga mga kaupdanan.
Samtang yara sa amo nga dalan, ginapahayag nga nagbaisay pa ang duha kag sandig sa mga witnesses, akig na ang lalaki.
May barangay official nga nagtawag sa police station, kag sang nag-abot ang pulis, gintiro na ni Ocampo ang babayi kag ginapahayag ginpasundan pa gid sang pila ka lupok.
Sang nakita sang suspek nga nagapalapit ang pulis, nagpalupok man ini sa direksyon sang pulis rason nga nagpalupok na lang ang pulis agud proteheran ang kaugalingon.
Ginahulat pa ang resulta sang autopsy agud matumod kun sa diin kag pila ang igu sang mga napatay.
Magapatigayon man sang motu-propio investigation ang otoridad agud ma-establisar kun husto man ang bahin sang PNP personnel. ##
