ILOILO CITY — Nagapati naman ang Sta. Barbara Transport Cooperative nga bastante sa ila nga bahin ang ginhatag sang Land Transportation Franchising and Regulatory Board (LTFRB) kag Land Transportation Office (LTO) nga 15% buffer kag 25% sa peak hours.
Sa interview sang Bombo Radyo kay Pearl Joy Jamorin, General Manager sang nasambit nga kooperatiba, iya ginpahayag nga dapat sundon ang sistema agud mapabilin nga tayuyon ang pagserbisyo sang mga consolidated units sa mga pasahero.
Suno kay Jamorin, kinahanglan nga mangibabaw ang pag-intindahanay sa tunga sang city kag provincial units agud indi na magsalagisag ang gina-implementar nga tikang.
Para kay Jamorin, insakto lang ang 40% nga implementasyon sa diin 25% diri ang pahanugutan nga makasulod, samtang 15% naman kun rush hour.
Ginpahayag man sini nga makatatap ini sa mga pasahero bangud wala naman sang klase kag ilisipon na lang ang mga estudyante nga nagapadulong sa syudad.
Ginaduso man sini nga lantawon sang mga kooperatiba, operators, kag drivers ang time interval sang mga units agud matumod ang makabulig sa tanan.
Nagapati ini nga mas makapamaayo nga nagaguluwa ang nagkalain-lain nga tikang agud matumod ang nagakadapat nga himuon kag ma-improve ang dalagan sang byahe sa syudad kag probinsya.
