Nagdepensa ang Department of Trade and Industry (DTI) kasunod sang pagpakamalaot nga nabaton halin sa publiko matapos gin-anunsyo nga may gintukod nga technical committee sa Filipino dishes nga magadevelop sang national standards sa pagluto sang adobo kag iban pa nga bantog nga mga pagkaon.
Suno sa DTI, ang ila tuyo nga idevelop ang standards sa pagluto sang adobo ang nagatuyo lamang nga maka-come up sa mga recipes nga pwede mapromote sa luwas sang pungsod.
Gin-athag man sang DTI nga wala sini gina-redefine kun ano man ang paglantaw sang mga tawo subong sa adobo.
Suno pa sa ahensya, wala sang dapat nga kahangaw-an bangud kabahin lamang ini sang pagdevelop sang mas creative nga industry exports ukon “international promotions” sa mga pagkaon.
Ginpahayag man nga kun ano man ang mahimo nga standard sang ila committee, indi ini mangin mandatory standard bangud nahangpan man nila nga may linibo ka paagi ang mga Pinoy sa pagluto sang adobo.
