Gin-aprubahan na sang Sangguniang Panlalawigan sang Iloilo ang rekomendasyon sang Iloilo PDRRMC nga ideklara ang province-wide state of calamity bangud sa red-striped soft scale insect (RSSI) infestation.
Ang RSSI infestation, nagtuga sang P1.18 billion nga production losses sa sugarcane industry sang probinsya sa diin malapit sa 9,500 ka mga mangunguma kag masobra 10,000 ektarya sang agricultural land ang naapektohan.
Suno kay Geron Magbanua, acting head sang Provincial Agriculture Office (PAO), makabulig ang deklarasyon agud makakuha ang probinsyal nga gobyerno sang dugang nga pondo halin sa Quick Response Fund sang disaster risk reduction and management office kon kinahanglanon.
Ginpahayag ni Magbanua sa interview sang Miyerkules nga handum sang gobyerno nga maprotektahan dayon ang mga mangunguma kag mabuligan sila sa pag-atubang sang problema.
Apang, ginmanduan ang probinsyal nga gobyerno nga unahon anay ang paggamit sang regular nga pondo antes magkuha sang dugang nga pondo para sa mga tikang batok sa peste.
May yara sang 15 million pesos nga regular nga pondo ang PAO nga ginaplano gamiton para sa malawig nga mga solusyon, lakip na ang pagtukod sang temporaryo nga mga laboratoryo agud makapadamo sang biological control agents ukon mga natural nga organismo nga makakontrol sang peste.
Suno kay Magbanua, ang Department of Agriculture ang magaprodukto sang orihinal ukon pure breed sang biological control agents, samtang ang probinsyal kag municipal agriculture offices ang magapadamo sini para ipanghatag sa mga apektado nga mangunguma.
Nagaplano man ang probinsyal nga gobyerno nga maghatag sang pinansyal nga bulig sa mga mangunguma para sa pagbakal sang abuno kag iban pa nga kinahanglanon sa uma agud mabuligan ang ila gilayon nga pag-atubang sa paglapta sang RSSI.
Base sa report sang PAO nga ginpresentar sa miting sang PDRRMC, naglapta na ang peste sa 27 ka local government units sa probinsya. Nauna na nga nagdeklarar sang state of calamity ang Passi City kag ang mga banwa sang San Enrique kag Dueñas.
