Ginpalawig pa ni Presidente Rodrigo Duterte ang validity sang state of calamity tubtob sa Septyembre 12, 2022, tuga sang COVID-19 pandemic.
Nadesisyonan ni Pres. Duterte nga palawigon pa ang period sang state of calamity nationwide kasunod sang rekomendasyon sang National Disaster Risk Reduction and Management Council.
Ang iya nangin desisyon ang kasunod man sang pagtaas nga kaso sang COVID-19 cases kag numero sang mga napatay, sa pihak sang pagpaninguha sang gobyerno nga mauntat ang paglapta sang makalalaton nga balatian.
Sa idalom sang Proclamation 1218, ang extension ang magapahanugot sa national government, amo man sa local governments nga ipadayon ang implementasyon sang COVID-19 vaccination program, pag-augment pandemic response funds, pag-monitor kag pag-control sa presyo sang basic necessities kag prime commodities kag magahatag sang basic services sa mga apektado nga populasyon.
