Iloilo City – Pabor ang isa ka university president sa hagna nga ginduso sa Senado kaangot sa pagpatukod sang mental health services para sa mga school campuses.
Nahibaluan nga nabutang sa Senate Bill 1508 ukon State Universities and Colleges Mental Health Act nga gin-file ni Senator Jinggoy Estrada nga nagatuyo pabaskugon ang mga mental health services sa mga school campuses sa pungsod.
Sa interview sang Bombo Radyo kay Dr.Joselito Villaruz, President sang West Visayas State University, iya ginpahayag nga dungganon ini nga tikang bangud mahatagan sang importansya ang mental health sang mga estudyante.
Suno kay Villaruz, multifactorial ang rason sang ginaatubang nga problema sang mga estudyante kaangay sang academic issues, family dynamics kag socioeconomic problems.
Dugang sang natungdan, antes pa man pag-file sang amo nga hagna, may yara na sang ginpatuman nga mga pamaagi ang unibersidad kaangay sang hotline kag mentoring program para sa nagakinahanglan nga estudyante.
Nagpaalinton naman si Villaruz nga sa tion nga may ginaatubang nga problema, mahimo nga magtawag sa suod nga abyan ukon sa guidance counselor kag professional.
