ILOILO CITY – Ginpahayag ni Department of Health officer in charge Dr. Ma. Rosario Vergeire nga indi dapat pagpunggan sang mataas nga detection sang Coronavirus disease 2019 ang mga tawo sa paghimo sang ila trabaho.
Ini ang sabat ni Vergeire sang ginpamangkot kun bala, dapat nga indi pagdayunon ni President Ferdinand “Bongbong” Marcos Jr. ang iya state visit sa Beijing bangud sang mataas nga numero sang Coronavirus disease 2019 sa China.
Suno pa sa iya, ang mga state visits sang presidente ang tuman ka importante para sa ekonomiya.
Una na nga ginpahayag ni Dr. Tony Leachon nga ang trip ni Marcos sa China ang mahimo nga mangin “super spreader event.”
Dugang pa niya, ang trip sang presidente ang indi makabig nga life and death situation.
Kung madumduman, sang Nobyembre, gin-anunsiyo ni Marcos nga ginbaton niya ang imbitasyon ni Chinese President Xi Jinping para sa isa ka state visit sa China sa Enero 2023.
Base sa mga reports, ang provincial government sang Zhejiang nga isa ka dako nga industrial province malapit sa Shanghai nga may yara sang populasyon nga 65.4 million ang nagapakigbato sa ginabanta isa ka milyon nga daily COVID-19 infections nga ginalauman nga magadoble pa sa mga masunod nga inadlaw.
Suno naman sa mga health authorities sa southeastern Jiangxi province, ang infection ang ginapanan-aw nga magasaka pagid sa Enero ilabi pa nga magadamo man ang mga tawo nga mapadulong sa lugar bangud sang Lunar New Year celebrations.
Nagpaandam man sila nga posible nga ang wave sang infections ang magadugay tubtob sa tatlo ka bulan kag ginabanta 80 percent sang probinsya ang na-infect.
Sa syudad sang Qingdao sa eastern Shandong province, ginabanta tunga sa milyon kada adlaw ang nalatnan sang balatian.
