Gin-ako ni Iloilo City Mayor Jerry Treñas nga gintinghuwaan niya nga mabuligan si former Mayor Jed Patrick Mabilog sang ini ang nagapangatubang sang mga alegasyon.
Sa interview sang Bombo Radyo kay Treñas, iya ginpahayag nga nagsakit gid ang iya nga buot sa pagpang-atake sang anay alkalde ilabi na nga isa man siya sa mainit nga nag-abi-abi kay Mabilog sang nagpauli ini sa syudad.
Ginbalikan pa sang natungdan ang iya nangin pahayag nga “Jed is not an enemy.” apang wala siya sang may maubra bangud padayon siya nga ginahaboyan sang mga tinaga ni Mabilog.
Suno kay Treñas, sugod sang nahimo ni Mabilog ang nasambit nga mga akto, naglain na ang iya panulok sa anay alkalde.
Gin-athag naman sang alkalde nga si Mabilog lang man ang nag-clear sa iya nga kaugalingon kag indi buot silingon nga cleared na siya sa mga kaso nga ginapangatubang sini.
Nagpalabtik man ini nga isa na ka ‘common knowledge’ sa mga nakahibalo nahanungod sa kaangtanan ni Mabilog sa iligal nga druga.
Ginlaragway na man sang Team Sulong Gugma ni Iloilo City Lone District Representative Julienne “Jamjam” Baronda nga isa lamang ka spekulasyon ang statement nga ginpaguwa ni Iloilo City Mayor Jerry Treñas nahanungod sa mga mabug-at nga ebidensya nga nagaangot kay former Mayor Jed Patrick Mabilog sa iligal nga druga.
Sa interview sang Bombo Radyo kay Atty. John Mallare, spokesperson sang Team Sulong Gugma, iya ginpahayag nga nagapabilin nga spekulasyon lamang bangud wala sang direkta nga ebidensya nga nagatumod sa anay alkalde.
Suno kay Mallare, director mismo sang Philippine Drug Enforcement Agency (PDEA) ang nagsiling nga ang ngalan ni Mabilog ang nadala lamang sa drug list bangud sa nangin pahayag sang anay presidente nga si Rodrigo Duterte.
Gintumod man sini nga ang PDEA man nagpamatuod nga wala sang verifcatio nga natabo agud mabutang sa drug list ang pangalan ni Mabilog.
Ginkwestyon man sang natungdan kon ngaa subong lang ginpaguwa liwat ang amo nga issue nga nagsugod na man ang local campaign period.
Nagakatingala man ini kon ngaa si Mabilog ang ginatira sang Partido ni Treñas nga wala man nagapadalagan sa eleksyon ang anay alkalde kag nagaserbe lamang nga campaign manager.
