Isa ka ebidensya suno kay Vice President Sara Duterte nga may ara gid sang harassment kag surveillance operations ang Philippine National Police ang nangin pahayag ni Department of Interior and Local Government Secretary Jonvic Remulla nga nakahibalo ang mga awtoridad kun sa diin sya sang gin-isyu ang warrant of arrest may kaangtanan sa kaso niya nga grave threats.
Sa statement nga ginpaguwa sang bise presidente pinaagi sa social media, ginpahayag sini nga madugay na nga panahon nga ginapasundan siya sang administrasyon kun sa diin may ara ini sang gina-alokar nga dako nga pondo sang gobyerno.
Pahayag ni Duterte, mas maayo kun gamitun nalang ini agud matapna ang krimen sa pungsod kag para man pasabton ang mga opisyal sang gobyerno nga ginpahayag nakabatun sang minaleta nga kwarta halin sa kaban sang publiko.
Ginkwestyon man sini si Remulla kun ngaa kinahanglan gid nga kadtuan sang mga awtoridad ang iya iloy kag mga kabataan nga ginakabig sini isa ka pagpamahog.
Dugang pa niya, wala sya sang salig sa tiglikom kag sa mga pulis nga nagasunod-sunod sa korap nga administrasyon ni President Ferdinand Marcos Jr.
