Ginapan-aw nga ‘very unpredictable’ pa sa subong ang posible mangin resulta sang US presidential election sa tunga nanday Kamala Harris kag Donald Trump.
Sa interview sang Bombo Radyo kay Alex Vidal, Bombo International Correspondent in USA, iya ginpahayag nga dapat tutokan ang mga boto nga posible makuha sang mga presidentiables halin sa 7 battleground states.
Lakip diri ang Georgia, Arizona, Michigan, Nevada, North Carolina, Pennsylvania, kag Wisconsin.
Suno kay Vidal, ang Pennsylvania ang may pinakadako nga sakop sang boto sa nasambit nga pito ka mga estado.
Ginpahayag man sini nga sa Pennsylvania, may neck-to-neck race si Trump kag Harris kon sa diin, nagapabilin nga wala sang maathag nga nagapanguna ukon frontrunner sa ila.
Nahibaluan nga posible magdaog sa eleksyon ang isa sa mga presidentiables kon makuha ang majority sang Pennsylvania kag sang 19 ka electoral votes sini, nga amo ang pinakamadamo sa mga battle ground states.
Si Kamala Harris kag si Donald Trump ang naghiwat sang mga dueling rally nga pila lamang ka milya ang kalayuon sa isa kag isa sa swing state kag pinakadaku nga syudad sang Wisconsin, nga amo ang Milwaukee.
