Ginluthang-patay sang duha ka mga lalaki ang stay-in driver ni Land Transportation Office (LTO) VI director Atty. Gaudioso P. Geduspan II sa Parc Regency Subdivision, Brgy Ungka 2, Pavia, Iloilo kagab-i, Abril 3.
Ang biktima amo si Wilmer Casquite Villaros, legal ang edad, kasado, residente sang Janiuay, Iloilo, apang temporaryo nga nagatinir sa amo nga subdivision.
Sa interview sang Bombo Radyo kay Police Liutenant Gabriel Manguera, deputy chief of police sang Pavia Municipal Police Station, iya ginpahayag nga samtang nagatindog ang driver sa guwa sang balay sang iya amo, hinali lang nga may naglabay nga duha ka mga kalalakihan, gintiro ini sang duha ka beses, kag gilayon nga nagpalagyo.
Nadakpan naman ang duha ka mga suspek nga lalaki nga sanday Jay-R, 40, kag Boy, 45, nga natukiban nga mag-utod, kag nagaalegar nga taga-Barangay Aldeguer, Sara apang may I.D. nga nagapakita nga taga-Pampanga.
Na-aresto ang duha paagi sa checkpoint sang Sara Municipal Police Station kag sa bulig sang description nga ginhatag sang Pavia police lakip na ang plate number sang salakyan nga Isuzu Crosswind nga ila gingamit sa pagpalagyo. Nakumpirma nga sila ang mga suspek paagi sa closed circuit television (CCTV) footage nga ginpakita sang Pavia MPS sa pulis sa Sara kun sa diin nagasanto pati ang itsura kag mga panapton.
Sa interview naman sang Bombo Radyo kay Police Major Jose Nemias Pamplona, hepe sang Sara MPS, iya ginpahayag nga base sa statement sang mga suspek, bangud sa ila nga kakulba, ginhaboy nila ang armas nga gingamit gani nga wala ini na-recover sa ila possession.
Base pa sa mga suspek, ginapahog sila sang biktima paagi sa pagtulok-tulok kag pagbunot sang armas, gani gin-unahan na lang nila ini sa pagpatay.#
