DUMANGAS, ILOILO – Maga-appeal sa korte ang tagdumalahan sang Stephanie Coliseum agud nga magpangayo sang kaathagan tuhoy sa Presidential Decree 1602 ukon may kaangtanan sa paghatag sang silot sa nagahimo sang illegal gambling.
Sa interview sang Bombo Radyo kay anay Batanes Lone District Rep. Carlo Oliver Diasnes, tag-iya sang Stephanie Coliseum sa Brgy. Balabag, Dumangas, Iloilo,
iya ginpahayag nga wala siya sang plano nga pasakaan sang kaso ang mga pulis nga nagpatigayon sang joint operation sa baylo, luyag niya maathagan kun bala ano ang sakop sang cock fighting area.
Suno kay Diasnes, nagalapad sang 5 hectares ang compound sang Stephanie Coliseum nga nahatagan sang prangkisa sa sulod sang 25 ka tuig.
Ginpahayag ni Diasnes nga kumpleto sa dukomento ang pagpatindog sang bulangan kag sa pagkamatuod, iya pa nga ginpa-islan ang mga typographical error agud nga wala sang kwestyonable.
Kasunod sang ginpatigayon nga raid, ginpahayag sang natungdan nga iya nga ginbasa kag ginhangop ang kaundan sang cock fighting law kag wala man nakasaad dapat ang bulang ang yara lang hiwaton sa sulod sang cockpit arena.
Kun basehan ang natabo, ginpahayag sang tag-iya nga ang pauwak ang natabo 100 metros gikan sa cockpit arena apang nakasulod sa gihapon sa compound sang Stephanie Coliseum.
Kadungan sini, gin-athag man ni Diasnes nga wala siya nakapromisa nga siya ang magabayad sang pyansa sa baylo, iya lang nga ginpromisa nga magkuha sang abogado agud nga mabuligan kag mabawi sang 154 ka mga nagkaladakpan ang ila mga kwarta.
