Sa ikaduha nga tion sa sulod lamang sang isa ka semana, ginlutos sang Cleveland Cavaliers si Stephen Curry kag ang Golden State Warriors, 118-110.
Anum ka players sang Cavs ang naka-skor sang double figures sa Chase Center sa San Francisco, California sa pagpanguna ni Donovan Mitchell nga may 21 points, pito ka rebounds, lima ka assists kag duha ka steals.
Photo: Bay Area News Group/Jane Tyska
Sa 6:23 mark pa lamang sa third quarter, ginpaguwa na ang forward sang Warriors nga si Draymond Green bangud sa iya ikaduha na nga technical foul.
Nagpanguna si Curry sa Dubs nga may 30 points kun sa diin 17 sa sini ang ginbubo sa first half.
Sa ikatatlo nga quarter, nakahimo na ang two-time MVP sang rekord bilang ika-35 nga player sa maragtas sang NBA nga nakalab-ot sa 22,000 career points.
Nagpanaog na sa 6-4 ang rekord sang Warriors sini nga season matapos ginlutos man sang Cavs, 115-104, sang nagligad nga inadlaw.
Sunod sini nga atubangon ang Minnesota Timberwolves samtang makasambuwa naman sang Cavs ang Sacramento Kings.
