Sa 124 nga aspirants sa 2023 Philippine Basketball Association (PBA) Draft, napilian ang Filipino-American nga si Stephen Holt bilang number 1 overall pick.
Yara sa iya balay sa Portland, Oregon ang 31-anyos nga point guard sang nalawagan ang iya pangalan bilang overall top pick sang Terrafirma Dyip sa idalom ni head coach Johnedel Cardel.
Ang nasambit nga 6-foot-4 playmaker ang produkto sang Saint Mary’s College of California kag may impresibo nga rekord matapos nakahampang na sa National Basketball Association (NBA) G-League kag NBA Summer League.
Nakahampang naman ini sa Andorra, Spain, Czech Republic, Poland, Kazakhstan, Slovenia, kag Romania sa iya isa ka dekada nga professional career.
Gin-ako sini nga ginbalibaran niya ang tanyag sang European teams agud pasulabihon ang pagsulod sa PBA.
Nangin eligible siya sang ginkakas sang PBA nga age limit nga 30 anyos para sa draft aspirants.
Si Christian David naman nga nakahampang anay sa Korean Basketball League ang napilian sang Blackwater Elite bilang second overall.
Naga-kumpleto sa top four picks sanday Luis Villegas kag Keith Datu sa Rain or Shine.
Sa second round naman nalawagan ang former University of the Philippines Maroons shooting guard kag Gilas Pilipinas stalwart nga si Ricci Rivero, baliskad sa prediksyon nga makuha ini bilang first-round pick. Ginpili sang Phoenix si Rivero bilang No. 17 overall.
Ang talalupangdon pa nga nakasulod amo si John Amores nga napilian sang NorthPort sa fifth round. Kontrobersyal ang pangalan ni Amores matapos ini nag-amok kag nagpanumbag sa players sang College of St. Benilde Blazers sa hampang sang Nobyembre 2022 nga rason nga ginsuspinde ini sang National Collegiate Athletics Association kag ginpahalin sa Jose Rizal University basketball program.
Napilian naman sang San Miguel sa ninth round kag nangin 76th overall ang online sensation kag Maharlika Pilipinas Basketball League quadruple-double guy nga si Kyt Jimenez. #
