Indi pa mahambal sang sang isa ka eskperto nga madamo na ang na-edukar nahanungod sa mental health condition diri sa Pilipinas.
Sa interview sang Bombo Radyo kay Dr. Florence Matthew Besares, isa ka psychiatrist, iya ginpahayag nga nagapabilin sa gihapon ang “stigma” apisar nga amat-amat nga gina-edukar ang mga Pilipino kaangot sa mental nga bahin sang ikaayong-lawas.
Suno kay Besares, indi tanan nga concern sa mental health ang matawag nga “nabuang” nga masami man nga ginagamit nga terminolohiya sa mga tawo nga naga-eksperyensya sang psychological condition.
Nagpanawagan man ini sa mga pamatan-on nga gamiton kag i-take advantage ang social media agud magamit bilang isa ka source agud nga mapalapnag ang kahulugan kag importansya sang mental health condition.
Ginaduso man sini ang tagsa ka indibidwal nga indi magkahadlok nga magpamangkot sa mga doktor kag eksperto nahanungod sa kondisyon sang mental health bangud indi ma-control ang nagasulod sa aton nga panghuna-huna.
Mahimo lamang nga ma-control sang isa ka tawo ang iya nga pangginawe kaangay sang kon paano kita mag-istorya kag mag-akto.
Gintumod man sang eksperto nga indi tanan nga eksperyensya nga naagyan sang isa ka tawo ang masarangan man sang sang isa pa ka tawo, rason man nga kinahanglan mangin “compassionate” sa himata ukon kapamilya.
