ILOILO – Madamu ang maapektuhan sa pagpasirado sang tanan nga gaming entities nga yara sa idalom Philippine Charity Sweepstakes Office.
Sa interview sang Bombo Radyo kay Noel Go, operations manager sang Red Subay Gaming Corp., ang operator sang Small Town Lottery sa Iloilo, iya ginpahayag nga nakibot sila sa mandu ni Presidente Rodrigo Duterte nga pagpauntat sang tanan nga sahi sang pataya sa idalom sang Philippine Charity Sweepstakes Office.
Suno kay Go, wala gid sila naghuna-huna nga ipasirado ni Presidente Duterte ang tanan nga gaming entities bangud sa iya bahin, wala man niya maaktuhan ang ginapahayag kurapsyon sa Philippine Charity Sweepstakes Office.
Sa pagkamatuod suno kay Go, sang nakaligad nga pagsinapol nila nga mga Small Town Lottery operators kaupod ang mga tiglawas sang Philippine Charity Sweepstakes Office, ila nga ginpalab-ot ang tanan nila nga problema.
Ginpahayag sang natungdan nga kadungan sang pagsinapol, ginpakilala pa sa ila ang bag-o nga general manager sang Philippine Charity Sweepstakes Office nga si Royina Garma.
