ILOILO CITY – Ginkasubo sang operator sang Small Town Lottery (STL) sa probinsiya sang Iloilo, ang pagkaulamid sang iya ngalan sa iskandalo sa Philippine Charity Sweepstakes Office (PCSO).
Ini matapos ginhingadlan ni PCSO Board Member Sandra Cam sa hearing sang Kamara kahapon, nga isa ka drug personality si Sam Aguilar sang Eagle Crest Gaming Corporation, kag may kaangtanan ini sa napatay nga drug lord nga si Melvin Odicta.
Sa interview sang Bombo Radyo Iloilo, ginpahayag ni Aguilar nga naipit siya sa away nanday Cam kag PCSO general manager Alexander Balutan.
Hugot naman nga ginpanginwala sang STL operator nga may kaangtanan ini kay Odicta kag mangin kay Iloilo City Mayor Jed Patrick Mabilog.
Ginpanindugan ni Aguilar nga wala siya malakip sa narco list ni Presidente Rodrigo Duterte.
Una na ginpahayag ni Cam nga naga-supply sang iligal nga droga si Aguilar kay Odicta.
Samtang gin-ako naman ni Aguilar nga nagpakigkita ini kay Balutan apang naghatag lang siya sang mga dokumento para mangayo sang medical assistance kag ginahimo lang ini kada office hours.