ILOILO CITY – Ginkumpirma sang pamunuan sang Police Regional Office (PRO) 6, nga nalakip sa narco list ni Presidente Rodrigo Duterte ang operator sang Small Town Lottery (STL) sa probinsiya sang Iloilo.
Sa interview sang Bombo Radyo Iloilo kay PRO-6 director Chief Supt. Cesar Hawthorne Binag, iya ginpahayag nga nalakip ang pangalan ni Aguilar sa una nga listahan nga ginpaguwa sang presidente.
Suno kay Binag, matapos mabaton ang kopya sang listahan, gilayon sila nagpatigayon sang case build-up bangud indi man gilayon maaresto si Aguilar nga wala sang ebidensiya.
Naulamid ang ngalan ni Aguilar matapos ginbuyagyag ni PCSO Board Member Sandra Cam sa hearing sang Kamara nga isa ang STL operator sa mga drug personality sa Iloilo kag may kaangtanan ini sa napatay nga drug lord nga si Melvin Odicta.
Apang hugot naman ini nga ginpanginwala ni Aguilar sa interview sang Bombo RAdyo.
Suno naman kay Iloilo Provincial Police Office (IPPO) director S/Supt. Marlon Tayaba, magluwas sa iligal nga droga, sanday Aguilar man kag Odicta ang sa likod sang iligal nga pasugal sa probinsiya sang Iloilo.