ILOILO-Wala pa sang kapat-uran kun makabalik sa operasyon ang Small Town Lottery sa probinsya sang Iloilo.
Ini apisar ginbawi na ni Presidente Rodrigo Duterte ang suspension sang operasyon sang Small Town Lottery sa pungsod nga ginkumpirma naman ni Philippine Charity Sweepstakes Office General Manager Royina Garma apang may mga kondisyon.
Sa interview sang Bombo Radyo Iloilo kay Mr. Noel Go, Operations Manager sang Red Subay Gaming Corporation nga naga-operate sang Small Town Lottery sa probinsya sang Iloilo, iya ginpahayag nga tuman ka bug-at sang mga kondisyon sa diin kinahanglan nila magbayad sang shortfall kag tatlo ka bulan nga Guaranteed Minimum Monthly Retail Receipts sa Philippine Charity Sweepstakes Office.
Suno kay Go, ini nagakahulugan nga magabayad sila sang P389 million nga shortfall kag P333 million nga Guaranteed Minimum Monthly Retail Receipts sa sulod sang tatlo ka bulan bag-o sila makabalik sa operasyon.
Sa subong, ila ginalantaw ang posibilidad sang pag-apelar sa Philippine Charity Sweepstakes Office bangud sa mabug-at nga mga kondisyon sa mga Authorized Agent Corporations agud makabalik sa operasyon.
Nahibaluan ng isa man sa mga kondisyon amo nga may pirmahan nga undertakings ang mga Authorized Agent Corporations sa diin nasaad ang ila tagsa ka mga obligasyon sa STL agency agreement kag kun may nalapas man, gilayon ini nga i-terminate sang PCSO.
Nahibaluan nga sang Hulyo, ginsuspende ni Presidente Duterte ang operasyon sang STL bangud sa alegasyon nga madata ang korapsyon sa nasambit nga ahensya.
