ILOILO CITY – Arestado ang isa ka street level individual sa ginpatigayon nga drug buy bust operation sa Ledesma St., Brgy. Gloria, City Proper, Iloilo City.
Ang durugista amo si Kentjon Sajonia, 22, residente sang Barangay Tabuc Suba, Lapaz, Iloilo City.
Nakuha sa iya ang ginabanta duha ka gramo sang ginapatihan shabu nga may standard drug price nga P13, 600.
Sa interview sang Bombo Radyo kay Police Captain Roque Gimeno III, officer in charge sang Iloilo City Police Station 1, iya ginpahayag nga madugay na nga nagasulod ang pangalan ni Sajonia sa ila nga monitoring.
Suno kay Gimeno, duha ka beses nga nabaklan sang droga ang subject sa ginpatigayon nga validation.
Ang droga ang gina-deliver mismo ni Sajonia sa iya mga parokya sakay sa kaugalingon nga motorsiklo kag nagapakunu-kuno ukon naga-commute pinaagi sa tricycle.
Natumod man sang kapulisan nga kay certain Kenmark sa Barangay Desamparados, Jaro ginakuha ni Sajonia ang iligal nga droga.
Sa subong, preso na sa Iloilo City Police Station 1 si Sajonia kag natalana nga pasakaan sang kaso nga paglapas sa Republic Act 9165 ukon Comprehensive Dangerous Drugs Act of 2002.
