Nagbalik na sa ila nga mga pwesto ang pila ka mga street vendors sa Plazoleta Gay matapos ang mga ini ang ginpangabay sang city government nga indi anay magplastar bangud sa ginhiwat nga ASEAN meeting sa syudad suno sa mga vendor.
Sa interview sang Bombo Radyo kay Rosalyn, isa sa mga street vendor, iya ginpahayag nga may ara sang nagpalapit sa ila sang nagligad nga semana
kag naghingyo ini nga indi anay sila magbaligya sa adlaw sang Huwebes, Pebrero 26, bangud may ara sang maga-abot nga mga bisita.
Suno man sa iya, wala man naglain ang iya buot bangud naintindihan niya ang sitwasyon kag ang ila kahimtangan nga mga sidewalk vendors.
Ginpakigbahin man ni Rosalyn nga ini ang una nga beses nga nagpalapit ang city government sa ila agud nga indi anay magbaligya.
Madumduman nga ang Iloilo City amo ang host sang 49th meeting sang High-Level Task Force on ASEAN Economic Integration sa idalom sang Association of Southeast Asian Nations, nga ginhiwat halin Pebrero 25 tubtob 27.
