Duha ka daog na lang ang kinahanglan sang Strong Group-Pilipinas agud ma-sweep ang basketball tournament sa Taiwan kag madala-pauli ang titulo sa 2024 William Jones Cup.
Naangkon sang Pilipinas ang ika-anum sini nga asud-asud nga kadalag-an sang ginlutos sini ang under-22 team sang Japan subong nga Byernes, Hulyo 19, sa score nga 92-79.
Naghampang ang team nga wala ang star players sini nga Rhenz Abando kag Ange Kouame nga may minor injuries kag ang American import nga si Tajuan Agee nga nagamasakit.
Apisar sini, gin-dominar sang Pilipinas ang sambuwa kag nakuha ang top-two finish sa single round-robin tournament nga may 6-0 slate.
Nagpanguna sa Strong Group ang super import sini nga si Chris McCullough nga may 26 points samtang ang Filipino-American guard nga si DJ Fenner ang nagtapos nga may 17 points.
Atubangon sang team ang Chinese Taipei-White sa penultimate game buwas antes makasambuwa ang isa man ka undefeated team nga Chinese Taipei-Blue sa Domingo.
Ang team nga may best record sa pagtakop sang tournament amo ang ginalantaw nga magabulsa sang kampyonato.
