Nagbalik na sa Pilipinas ang korona sa William Jones Cup matapos ang lima ka tuig!
Natabo ini sang ginlutos sang Strong Group-Pilipinas ang host team nga Chinese Taipei-Blue sa overtime, 83-79, sa championship match subong nga gab-i sa Xinzhuang Gymnasium sa New Taipei City, Taiwan.
Nagpanguna sa team ang American import nga si Tajuan Agee samtang daku man ang kontribusyon sang locals nga sanday Kiefer Ravena kag RJ Abarrientos para makuha sang pungsod ang ika-pito na sini nga Jones Cup title kag nagpabilin nga undefeated sa walo ka hampang sa 2024 edition sang sini nga tournament.
Sa final game, nagtapos si Agee nga may 21 puntos, may 14 si Abarrientos samtang 9 naman ang kay Ravena.
Ang pag-kampyon sang Pilipinas amo man ang naghatag sa Chinese Taipei-Blue sang una sini nga kalutusan subong nga tournament (7-1).
Antes ini nga kampyonato, nadag-an man sang Pilipinas ini nga mid-year tournament sang 1982 (Northern Cement), 1985 (San Miguel), 1998 (Centennial Team), 2012 (Gilas), kag 2016 kag 2019 (Mighty Sports).
