ILOILO – Elementary pa lang, handom na sang Magna Cum Laude sa West Visayas State University – College of Agriculture and Forestry nga mangin isa ka agriculturist.
Ini amo si Clarence Jon Borra, Bachelor of Science in Agriculture major in Animal Science, residente sang Barangay Cagamutan Norte, Leganes, Iloilo.
Sa interview sang Bombo Radyo Borra, iya ginpahayag nga bugtong siya nga anak kag ginpadako siya sang iya iloy nga isa ka single parent.
Suno kay Borra, passion na niya ang agrikutura bangud sang gamay pa lang ini, nakahiligan na niya ang pagtanom kag pagsagod sang baboy.
Siya naman ang ika-apat sa ila henerasyon nga agriculture graduate sa diin pagpanguma ang iya gindakuan kag ini ang nagbuhi sa ila pamilya.
Ginbalikan man sini ang iya eksperyensya sang nagpasa ini sang requirements sa diin manug las 5:00 na sang nakaabot ini sa Lambunao.
Apang bangud pangayaw ini, wala pa siya sang ideya kun ano ang iya sakyan pauli tubtob nga ginpasakay ini sang mga manunudlo sa ila service nga tricycle.
Sang nakasulod na ini sa unibersidad, ginpa-istar naman ini sang mga manunudlo sa ila ginatawag nga ‘cottage’ ukon quarters agud indi na ini magastuhan pa.
Nangin maduagon naman ang kabuhi sini sa sulod sang unibersidad bangud nangin Supreme Student Council Chairperson ini kag atleta sa diin gintutukan sini ang Arnis.
Sa pihak sini, wala naman niya napabay-an ang iya pagtuon sa diin sang nag-graduate ini, magluwas sa Latin Honor, ginpasidunggan man ini bilang Service Awardee, Best Researcher, Best Undergraduate Research Papers, Most Outstanding OJT Student.
