Mangin isa ka generational problem ang stunting ukon pagkakulang sa physical kag mental development sang isa ka bata kun indi pagsolusyunan ang malnutrisyon.
Sa interview sang Reginaldo Guillen, Regional Nutrition Program Coordinator sang National Nutrition Council Region 6, iya ginpahayag nga ang stunting amo ang impaired ukon indi normal nga development kag growth sang isa ka bata nga nagaresulta sang iya pagka-putot tuga sang malnutrisyon.
Sa rehiyon VI, nagpanguna ang probinsya sang Antique sa may pinakamataas nga numero sang mga preschoolers nga stunted ukon putot.
Ini ang base sa data sang National Nutrition Council Region 6 sa diin nakarekord ang Antique sang 10.76 percent nga prevalence sa stunting sa mga kabataan nga naga-edad sang zero to 59 months.
Suno kay Guillen, kun indi matabangan ang malnutrisyon sang bata antes maglapaw sa edad nga tatlo ka-tuig, mahimo nga mapasa man sini sa iya nga mga mangin kabataan ang epekto sang malnutrisyon kaangay sang pagka-putot, tuman nga pagkaniwang, kag obesity ukon may masobra nga kabug-aton.
Dugang pa niya, mahimo nga maapektuhan man sang malnutrisyon ang comprehension kag mental skills sang isa ka bata kun indi matapna.
Bangud sini, kadungan sang nutrition month sini nga Hulyo, ginaduso sang National Nutrition Council ang multi-sectoral approach sa pagtapna sang malnutrisyon sa diin ang tema nila amo ang ‘MALNUTRSIYON PATULOY NA LABANAN, FIRST 1000 DAYS TUTUKAN’.
