𝗧𝗨𝗕𝗨𝗡𝗚𝗔𝗡, 𝗜𝗟𝗢𝗜𝗟𝗢 — Nagreklamo ang subject sa buy-bust operation sa Tubungan, Iloilo kasunod sang ginpahayag sini nga siya ang biktima sang planted operation sang Tubungan Municipal Police Station.

Ang subject sa operasyon amo si Jonathan Estope, 39-anyos, manoglibod, kag residente sang Brgy. Bato Tubungan, Iloilo.

Sa interview sang Bombo Radyo kay Estope, iya ginpahayag nakibot lamang siya sang may nag-approach sa iya nga mga intelligence operatives kag naghambal nga may maistorya sa iya.

Suno kay Estope, ginpasakay siya sa isa ka pribado nga salakyan kag ginlibot-libot halin sa Brgy. Adgaw, Tubungan tubtob ga nakalab-ot sa Brgy. Camanggahan, kag Igcocolo, Guimbal, Iloilo.

Ginpahayag man sini nga sang nag-abot na sila sa Brgy. Igcocolo, ginpamangkot siya kon sin-o iya mga kaupdanan sa iligal nga druga apang wala ini sang may gintumod bangud suno sa iya, wala siya naga-engage sa iligal nga buluhaton.

Samtang nga yara siya sa sulod sang salakya, ginpainom siya sang tubig sang kapulisan sang makapila ka beses.

Sang ginpatigayon na ang drug testing sa iya, ginkakibot niya lamang sang nagguwa nga positibo siya sa paggamit sang iligal nga druga.

Matapos ang natabo, ginbalik siya sa banwa sang Tubungan kag idto nga gindeklara ang buy bust operation.

Nagpaathag naman ang Tubungan Municipal Police Station nga may mga ibedensya sila nga magapamatuod nga legit kag indi planted ang natabo nga buy-bust operation.

Suno kay Police Captain Jun Manguilimutan, hepe sang Tubungan Municipal Police Station, iya ginpahayag nga nabaklan ang subject sang balor P1500 baylo sang isa ka sachet sang illegal drug.

Ginpahayag man sini nga may anom ka mga additional nga sachets nga nakasulod sa wallet sang subject ang nakuha sang kapulisan.

Gin-athag man sini nga si Estope ang newly identified ang subject kag wala sang ano man nga record sa ila nga talatapan.

Ginpanginwala man sang natungdan ang nangin pahayag sang subject nga planted ang natabo nga buy bust operation bangud kapin duha ka semana nga gin-monitor ang subject antes ginpatuman ang operasyon.

Nahibaluan nga ginpatigayon sang otoridad ang operasyon sang Hulyo 5, 2024 sa Brgy. Adgaw, Tubungan, Iloilo.

Sa subong, ginahulat na lang ang mangin desposisyon sang korte kon sa diin ipahamtang ang subject matapos ang drug buy-bust operation.