Napilasan ang isa ka pulis matapos nga natiruhan sa ginpatigayon nga buy bust operation sang Provincial Drug Enforcement Unit (PDEU) sa Sitio Tuburan, Barangay Trapiche, Oton, Iloilo.
Sa amo man nga operasyon, nakapalagyo ang main subject kag ang kaupod sini nga kumpirmado nga may dala nga pusil kag granada.
Ang pulis ginkilala nga si Police Corporal Jilbert Lingaya nga nagaserbe nga backup; samtang ang main subject naman sa buybust amo si alias Mike, singkwentahon ang edad, kag tumandok sang amo nga barangay.
Sa interview sang Bombo Radyo kay Police Major Dadje De Lima, head sang PDEU, iya ginpahayag nga pasado alas tres pa lang kahapon sang hapon, nag-umpisa na sila sa operasyon kag natigayon nga nadakpan si alias Mike pasado alas syete sang gab-i.
Nakuha sa iya ang tatlo ka gramos nga ginapasuni shabu kabaylo sang P12,000.
Sang nadakpan na ang suspek kag nagapatigayon na sang inventory, nanotisyaran sang operatiba nga may tawo pa sa sulod sang balay. Sang gintulod ang puertahan, nagpalupok na ang gunman nga ginapatihan nga himata man ni alias Mike.
Naigu ang pulis sa butkon, kag nagsinggit ini nga mag-withdraw bangud may pusil kag granada ang gunman nga nakasanto man sa ila nga impormasyon halin sa confidential asset.
Ginpaathag ni Delima nga ginsapar nila ang seguridad sang ila kaupod kag ginhingalitan naman ini sang subject kag kaupod sini nga makapalagyo sa likod nga masiok kag madulom.
Masobra pa sa tatlo ka oras ang pag-kordon sa lugar, nagbulig sa pag-negosyar ang alkalde kag barangay officials apang wala sang may nagasabat. Sang ulihi, ginkumpirma sang otoridad nga nakapalagyo na ang subject kag himata sini nga subong ginakabig nga armed and dangerous.
NAKASUNGKA NA SANG UNA
Ginplastar man ni Delima nga nakasungka na anay sa ila barangay si alias Mike bangud sa involvement sini sa iligal nga droga.
Antes pa man ang ila nga operasyon kahapon, nahibaluan man nga nagkuha pa sang suplay ang subject para mabaligya. Ginapatihan nga ibaligya ini kadungan sang kapistahan sa Trapiche, Oton sa masunod nga mga inadlaw.
Ginkumpirma man ni Punong Barangay Jeorge Mediodea nga sang 2016 pa sang nag-surrender si alias Mike. Pahayag pa sang opisyal, may utod man ini nga nadakpan sang una.
Dugang sini, wala man sila nagkulang bangud gina-monitor nila ini kag masami man nga ginapatawag sa meeting sang Barangay Anti-Drug Abuse Council.#
