ILOILO CITY— Patay matapos nagbato sa mga otoridad ang subject sa buy bust operation nga ginpatigayun sang Regional Drug Enforcement Unit (RDEU) sa Brgy. Tanza Esperaza, Iloilo City.
Ang napatay nga subject ang ginkilala nga si Japhet Zerrudo, ginabanta naga edad sang masobra 20 anyos.
Sa interview sang Bombo Radyo kay Punong Barangay Wilbur Orada sang nasambit nga lugar, iya ginpahayag nga kaina sang kaagahon sang natabo ang buy bust operation.
Suno kay Orada, si Zerrudo ang nakaagi na preso sa Muntinlupa bangud man sa iligal nga droga.
Dugang pa ni Orada, sa sulod sang balay ginpatigayun ang buy bust operation kag bangud nagbato si Zerrudo sa mga otoridad, nagreturn fire man ang operatiba.
Ginpahayag man sang Punong Barangay nga posible sa saguwa sang ila barangay nagabaligya sang iligal nga droga si Zerrudo.
Nakuha naman kay Zerrudo ang pulo ka sachet sang ginapatihan shabu samtang nakuha naman sa crime scene ang duha ka slug sang ginapahayag calibre 38 nga armas luthang.
Ginapahayag nakaangkon sang lima tanan ka igo sa lawas si Zerrudo nga gintunaan sang iya kamatayon.
