ILOILO CITY – Ginkilala nga hitman sang Odicta drug group ang subject sang drug buy bust operation sa Brgy. Tanza Esperanza, Iloilo City nga napatay bangud sa ginapahayag nagbato sa kapulisan.
Ang subject amo si Japhet Zerrudo, legal ang edad, residente sang amo man nga barangay.
Sa interview sang Bombo Radyo kay Police Capt. Mark Dado, team leader sang Regional Drug Enforcement Unit (RDEU), iya ginpahayag nga madamo sang rekord si Zerrudo sa diin makapila na ka beses ini nga napreso bangud man sa nagkalain-lain nga kaso.
Suno kay Dado, madugay na nga ginamonitor sang mga otoridad si Zerrudo matapos nga makaguwa ini sa presohan sa kaso nga murder.
Magluwas sa murder, lakip man si Zerrudo sa robbery hold-up kag apisar yara sa sulod sang presohan sadto, nakuha pa sini nga magtransaksyon sang iligal nga droga.
Bangud nga ginapahayag nauna nga nagpalupok sang armas si Zerrudo, ginbalusan man siya sang lupok sang mga kapulisan rason sang iya kamatayon.
Ginakabig man nga High Value Target Level 1 si Zerrudo.
