ILOILO CITY – Kontrolado na sang MORE Electric and Power Corporation ang tanan nga substations sang Panay Electric Company.
Sa ginpatigayon nga press conference sang MORE Power, ginpahayag ni Atty. Hector Teodosio, legal counsel sang nasambit nga kompaniya, nga as of 11:00 am subong nga adlaw, ang mga personnel na sang MORE Power, ang nagadumala sa lima ka substation.
Suno kay Teodosio, matapos ang pagpaguwa sang desisyon kahapon, gilayon nga gin-umpisahan ang pagserbe sang Writ of Posession kag bangud nga hapon na, ginpadayon kaina sang aga ang pag take-over sa assets sang Panay Electric Company.
Halin sa security guard tubtub sa mga personnel, ang MORE Power na ang nagadumala sa mga substation lakip na sa switchboard.
Samtang, naglab-ot naman sa 39 ka reklamo ang nabaton sang MORE Power matapos nga ginbuksan ang ila hot line numbers.
Sa press conference, ginpahayag ni Atty. Allana Mae Babayen-on, legal counsel sang nasambit nga kompaniya, nga 24/7 nga bukas ang tanan nga hot line numbers agud nga magbaton sang reklamo, pamangkot ukon impormasyon gikan sa mga konsumidor.
Suno kay Babayen-on, may yara sang response team nga ginpang-deploy sa specific locations agud nga magpatigayon sang trouble shooting.
Maayo nga customer service kag power supply stability suno kay Babayen-on ang ginapromisa sang MORE Power sa mga konsumidor.
Para sa mga may yara sang reklamo ukon pamangkot, mahimo mag contact sa telephone number nga (033) 323-6619 kag (033) 327-2985 ukon sa cellphone number nga 09176375214 kag 09190720626.
Mahimo man nga magpadala sang mensahe sa Facebook Page sang MORE Power Iloilo.
