ILOILO CITY – Ginpanginwala ni Sugar Regulatory Administration chief David Thaddeus Alba nga may iban pa nga rason sa iya pagpanaog sa pwesto.
Sa statement nga ginpagwa sang natungdan, nag-resign siya agud nga ma-preserve ang ikaayong lawas kag maka-recover.
Suno sa iya, kun maayo lang ang iya ikaayong lawas, padayunon niya ang responsibilidad nga ginhatag sa iya ni President Ferdinand R. Marcos Jr.
Ginpasalamatan man sini ang presidente sa ginhatag nga oportunidad nga makaserbe sa idalom sang bag-o nga administrasyon kag sa pagbaton sa iya resignation.
Kung madumduman, ginpahayag sang Presidential Communications Office nga gin-inform ni Alba si Executive Secretary Lucas Bersamin may kaangtanan sa iya resignation.
Sa mandu sang presidente, ang resignation ni Alba ang mangin epektibo sa Abril 15 agud nga mahanda-an ang appointment sang magabulos sa iya.
Samtang, nagpanawagan si Senator Risa Hontiveros kay Alba nga ibuyagyag ang matuod nga rason sa iya pagpanaog sa pwesto.
Ginpahayag ni Hontiveros nga madamo sang sugar insiders ang nagapati nga ini ang klaro nga pamatuod nga si Alba ang nagagamit lamang sang Sugar Regulatory Administration nga iya rubber stamp agud nga ma-legitimize ang pagpabor nga ginghatag sa Asian kag duha pa ka mga importers.
