Magapatigayon sang protesta ang mga sugarcane farmers sa syudad sang Passi sini nga Enero 22 adlaw sang Huwebes bangud sang dako nga importasyon sang kalamay sa pungsod nga nagresulta sang kabudlayan sa mga nagapananom sini.
Sa interview sang Bombo Radyo kay Hernando “Boy” Divinagracia Jr., presidente sang Jalasig Sugarcane Planters Association, Inc., iya ginpahayag nga nagakatam-an na gid ang mga mangunguma sang sobra nga supply sang kalamay sa merkado.
Ginpahayag man niya nga ang mga Agrarian Reform Beneficiaries (ARBs) amo ang una nga naapektuhan sang sini nga sitwasyon bangud puno na ang mga bodega sang kalamay, gani indi na mabakal ukon mapresyuhan sang insakto ang ila produkto.
Dugang pa, ginapahayag sang grupo nga indi klaro kag indi transparent ang proseso sang importasyon, ilabi na bangud pati molasses gina-import man.
Suno sa grupo, indi makatabon sang konsumo ang lokal nga kalamay bangud ginabaha ini sang imported, gani ginapanawagan nila nga mangin insakto kag husto ang pag-import.
Ginpanawagan man sang mga mangunguma ang moratorium sa sugar importation, bangud bisan pa sila nagasulat kag naga-reklamo sa mga ahensya sang gobyerno, wala sila ginapamatian kag wala sang klaro nga sabat.
Bilang kabahin sang protesta, ginpahayag ni Divinagracia nga 17 tubtob 18 ka grupo sang sugar farmers ang nag-commit nga magapadala sang ila mga miyembro sa rally.
Gin-imbitar man nila ang iban nga mangunguma nga magsuksuk sang itom nga panapton bilang pagpakita sang ila nga pagprotesta kag pagpamatok sa nasambit nga polisiya para sa importasyon sang kalamay sa pungsod.
