GUIMARAS – Nagdangat sa 26 ang narekord nga suicide incident sa Probinsya sang Guimaras subong nga tuig.
Sa exclusive interview sang Bombo Radyo kay Police Col. Pablito Asmod Jr., Provincial Director sang Guimaras Police Provincial Office, iya ginpahayag nga ang nasambit nga data ang narekord humalin sang 1st tubtub 3rd quarter ukon Enero tubtub Setyembre subong nga tuig.
Sa nasambit nga numero, 9 ang narekord sa Buenavista, 6 sa Jordan, 5 sa Sibunag, 3 sa San Lorenzo, kag 3 sa Nueva Valencia.
Suno kay Asmod, kalabanan sa mga nagsuicide ang naghigot sang ila kaugalingon gamit ang nylon rope.
Magluwas sini, may ara man sang nagluthang kag naggamit sang kutsilyo.
Natukiban nga kalabanan sa mga biktima ang may ginabatyag nga depression ukon may yara sang nervous breakdown.
Nagpanawagan man ang opisyal sa pamilya nga giyahan ang ila himata kun may kaangay nga ginabatyag.
