ILOILO CITY – Patay ang isa ka katapo sang Philippine Army matapos ginluthang sang pakaisa nga barangay kagawad sa Brgy. Garangan, Calinog, Iloilo.
Ginkilala ang biktima nga si Staff Sergeant Rustom Caballero, 47, miyembro sang 61st Infrantry Batallion sang Philippine Army.
Sa interview sang Bombo Radyo Iloilo, ginpahayag ni Police Senior Inspector Kenneth Bermejo, hepe sang Calinog Municipal Police Station, hubog ang suspek nga si Barangay Kagawad Geraldo Caballero, 47, pumuluyo sang nasambit nga lugar.
Nanghangkat sang away ang suspek kag nagpinalupok gamit ang iya .22 caliber magnum revolver sa sulod sang basketball court sa ila lugar.
Ginsaway ini sang biktima, apang sa baylo nga mag-untat, ginluthang sang barangay kagawad ang suldado sa natuo nga tiyan nga amo ang gintunaan sang iya kamatayon.
Gilayon nga nagpalagyo ang suspek matapos ang insidente apang sa karon, nag-surrender na sa mga otoridad.